विराटनगर । विराटनगर महानगरपालिकाभित्र कार्यक्षेत्र भएका एक दर्जनभन्दा बढी सहकारीको दर्ता खारेज गरिएको छ ।
विराटनगर महानगरपालिकाले लामो समयदेखि सम्पर्कमा नआएका १५ वटा सहकारीको दर्ता खारेज गरेको हो । सहकारीहरूले लामो समयदेखि लेखा परीक्षण नगरेको, साधारणसभा नगर्ने तथा विवरण नबुझाएका कारण सहकारी ऐनअनुसार खारेज गरिएको महानगरले जनाएको छ ।
खारेजीमा पर्ने सहकारीमा विराटनगर–२ को सक्रिय बचत तथा ऋण सहकारी संस्था लि., विराटनगर–४ को पुष्पाञ्जलि बहुद्देश्यीय सहकारी, ५ को विराट कोसेलीघर, ५ कै एक्स्चेन्ज बचत तथा ऋण सहकारी, ७ को सुमेरु बचत तथा ऋण सहकारी र ८ को सहयोगी सहकारी संस्थाको दर्ता खारेज गरिएको छ ।
त्यस्तै विराटनगर–९ को भिजन फर्मा सहकारी, खाटुश्याम बचत तथा ऋण सहकारी, सत्यम् ओम साई बचत तथा ऋण सहकारी संस्था, सबल बचत तथा ऋण सहकारी संस्था, युरो बहुद्देश्यीय सहकारी संस्था लिमिटेड पनि खारेजीमा परेका छन् । महानगरका प्रमुख प्रशासकीय अधिकृत विष्णुप्रसाद कोइरालाका अनुसार विराटनगर–१२ स्थित गजलक्ष्मी बचत तथा ऋण सहकारी, १४ को गरिमा बचत तथा ऋण सहकारी, १४ को बहुमूल्य कृषि सहकारी र १५ को ऋद्धिसिद्धि बचत तथा सहकारी संस्थाको पनि दर्ता खारेज गरिएको हो ।
उक्त सहकारीलाई लेखापरीक्षणसहित आवश्यक कागजातका साथ महानगरमा सम्पर्कमा आउन गत फागुन २२ गते सार्वजनिक सूचना प्रकाशित गरेको थियो । पटक–पटक सूचना प्रकाशित गर्दा पनि सम्पर्कमा नआएपछि महानगरले खारेज गरेको कोइरालाले जानकारी दिए । दर्ता खारेज गरिएका सहकारीका कार्यालय पनि रहेका थिएनन् ।
