धरान । साइकल चोरी गरेको आरोपमा प्रहरीले दुईजनालाई साइकलसहित नियन्त्रणमा लिएको छ ।
झापाको भद्रपुर नगरपालिका–९ देवकोटा चोकमा साइकल चोरी गरिरहेको अवस्थामा प्रहरीले एकजनालाई रङ्गेहात पक्राउ गरेको छ ।
पक्राउ पर्नेमा सोही ठाउँका ३९ वर्षीय उदय दाहाल छन् । साइकल चोरी गर्दै गर्दा एक थान गियरवाला साइकल र थप २ थान साइकल बरामद गरेको हो ।
त्यस्तै भद्रपुर–८ का १९ वर्षीय पेन्टा भनिने लालदेव महतोलाई पनि साइकल चोरी गरेको आरोपमा पक्राउ गरिएको छ । उनीहरूलाई असार ३ गते पक्राउ गरिएको हो ।
महतोलाई गियरवाला साइकल चोरी गरी बिक्री गर्ने उद्देश्यले भारतर्फ लैजाँदै गर्दा मेचीपुलबाट नियन्त्रणमा लिएको हो । कुल चार थान साइकल नियन्त्रणमा लिएको जिल्ला प्रहरी कार्यालय झापाले जनाएको छ ।
