सुनसरी । इटहरी उपमहानगरपालिका-४ जनता टोलबाट पेस्तोल र लागूऔषधसहित ३ जनालाई प्रहरीले पक्राउ गरेको छ ।
उक्त स्थानमा पेस्तोलसहितका ब्यक्तिहरुले लागूऔषध बेचबिखन गरिरहेको भन्ने बिशेष सूचनाका आधारमा जेठ १३ गते राती ११ बजे ईलाका प्रहरी कार्यालय सुनसरीबाट खटिएको प्रहरी टोलीले ३ जनालाई पक्राउ गरेको हो ।
पक्राउ पर्नेहरुमा इटहरी उपमहानगरपालिका-४ का १९ बर्षीय धन बहादुर राई, २७ बर्षीय टिका राई र इटहरी-५ का २८ बर्षीय धन बहादुर राई रहेका छन् । उनीहरुको साथबाट प्रहरीले लेबल नलागेको लागूऔषध २४ एम्पुल र MADE IN USA लेखिएको पेस्तोल १ थान तथा सोही पेस्तोलको म्याग्जिन १ थान बरामद गरेको छ ।
लागूऔषध तथा पेस्तोलसहित पक्राउ परेका उनीहरुको सम्बन्धमा थप अनुसन्धान भईरहेको १ नम्बर प्रदेश प्रहरी कार्यालय, बिराटनगरले जनाएको छ ।
