धरान/अभिनेता अनमोल केसी र अभिनेत्री सुहाना थापाको शीर्षभूमिका रहने फिल्म ‘ए मेरो हजुर ४’ को शुभमुहूर्त गरिएको छ ।
शुक्रबार काठमाडौंमा भएको मुहूर्त कार्यक्रममा फिल्मका कलाकार अनमोल, सुहाना, सलोन बस्नेत उपस्थित थिए भने निर्देशक झरना थापा, छायाँकार सञ्जय लामालगायत उपस्थित थिए ।
अनमोल र सुहानाको जोडी रहेको फिल्म ‘ए मेरो हजुर ३’ ले दर्शकको साथ पाएको थियो । यद्यपि फिल्मले प्रतिक्रिया भने औसत पाएको थियो । झण्डै डेढ करोडमा निर्माण हुने यो फिल्ममा अनमोल र सुहाना प्रेमीप्रेमिकाको भूमिकामा देखिनेछन् । आगामी वर्षको दशैंमा रिलिज हुने भनिएको ‘ए मेरो हजुर ४’ सुनिलकुमार थापा प्रोडक्सन र सुहाना इण्टरटेनमेण्टको ब्यानरमा बन्न लागेको हो ।
यसअघि झरनाले निर्देशन गरेका फिल्म ‘ए मेरो हजुर २’ र ‘ए मेरो हजुर ३’ ले व्यावसायिक सफलता हात पारेका थिए । यद्यपि दुवै फिल्मले समीक्षा भने राम्रो पाएका थिएनन् ।
