धरान । साउदी अरबको जेद्दास्थित अमेरिकी महावाणिज्य दूतावास नजिकैको एक भवनमा गोली चल्दा बिहीबार एक नेपालीसहित दुईजनाको मृत्यु भएको छ ।
विभिन्न समाचार एजेन्सीका अनुसार एक नेपाली सुरक्षागार्ड र अर्का बन्दुकधारीको मृत्यु भएको हो । मृत्यु हुने नेपाली सुरक्षा गार्डको पहिचान खुलाइएको छैन ।
बन्दुकधारी सवार गाडी दूतावासनजिकै रोकेर आक्रमण गर्न थालेको प्रत्यक्षदर्शीको भनाइ उद्धृत गर्दै अलजजिराले जनाएको छ । यस घटनाबाट अमेरिकी नागरिकमा भने क्षति पुगेको छैन । गोली लागेर नेपाली सुरक्षागार्ड गम्भीर घाइते भएका थिए भने उनको उपचारको क्रममा मृत्यु भएको हो ।
