धरान । सुनसरीको इटहरी बजारमा टेम्पो चालकले सिटी सफारी चालकमाथि शनिबार धारिलो हतियार खुकुरी प्रहार गरी हत्या गरेका छन् ।
हत्याको कारण खुल्न नसके पनि टेम्पो चालक पक्राउ परेकाले अनुसन्धानमा सबै कुरा खुल्ने इलाका प्रहरी कार्यालय इटहरीका प्रमुख डिएसपी खगेन्द्रबहादुर खड्काले जानकारी दिए ।
उनका अनुसार इटहरी उपमहानगरपालिका ५ सिमरवनाका सफारी चालक भुने चौधरीमाथि खुकुरी प्रहार गरी गम्भीर घाइते बनाएका थिए । घाइते चौधरीलाई तत्काल उपचारका लागि धरानस्थित बीपी कोइराला स्वास्थ्य विज्ञान प्रतिष्ठानमा ल्याइए पनि मृत्यु भएको उनले जानकारी दिए ।
हत्या आरोपमा सोही स्थानका राम भुजेललाई प्रहरीले नियन्त्रणमा लिएको छ । आरोपित र मृतकबीच पारिवारिक सम्बन्ध पनि रहेको बताइएको छ तर हत्या गर्नुपर्ने कारण भने हालसम्म खुल्न सकेको छैन । मृतक चौधरीले को२ ह ४७४६ नम्बरको सिटी सफारी चलाउँदै आएका थिए ।
प्रहरीका अनुसार केही दिनअगि पनि घरमै गएर आरोपित भुजेलले चौधरीमाथि आक्रमणको प्रयास गरेका थिए ।
