विजयपुर । धरान–१० स्थित ‘हाम्रो होटल’ का सञ्चालकसहित ८ जुवाडेलाई प्रहरीले पक्राउ गरेको छ ।
उनीहरूलाई भदौ ५ गते राति १ बजे तास खेलिरहेको अवस्थामा पक्राउ गरेको जिल्ला प्रहरी कार्यालय सुनसरीका प्रवक्ता डीएसपी राजकुमार राईले जानकारी दिए ।
उनीहरूलाई इलाका प्रहरी कार्यालयको समूहले पक्राउ गरेको हो । प्रवक्ता राईका अनुसार पक्राउ पर्नेहरूमा होटल सञ्चालक सञ्जय राई, धरान–१६ का ३३ वर्षीय जीवन बस्नेत, धरान–११ का ४३ वर्षीय मोहन गुरुङ, ३५ वर्षीय शालीन राई, धरान–१३ का २७ वर्षीय विवेक राई, ४२ वर्षीय मणिराज राई, धरान–१५ का ३९ वर्षीय अरुण केसी र धरान–१९ का ३८ वर्षीय आइत लिम्बू रहेका छन् ।
उनीहरूको साथबाट २ लाख ५२ हजार ८ सय ३५ रुपैयाँसहित ५ बुक तास बरामद गरेको प्रवक्ता राईले बताए । उनीहरूविरुद्ध जुवा ऐनअन्तर्गत म्याद थप गरी अनुसन्धान गरिरहेको प्रहरीले जनाएको छ ।
