भोजपुर । भोजपुुरमा चोरी भएका मोटरसाइकल खोजीमा उत्कृष्ट काम गर्र्नेे प्रहरी निरीक्षक सहित बरिष्ठ प्रहरी हवल्दारलाई सम्मान गरिएको छ ।
जिल्लाबाट हराएका मोटरसाईकल खोजीमा उत्कृष्ट काम गर्ने इलाका प्रहरी कार्यालय तिवारीभञ्याङका प्रहरी निरीक्षक अर्जुनकुमार अधिकारी र प्रहरी चौकी च्याङग्रेका इन्चार्ज बरिष्ठ प्रहरी हवल्दार हरि लामालाई पौवादुङमा गाउँपालिकाले सम्मान गरेको हो ।
अपराधिक घटना नियन्त्रणका साथै चोरी भएका मोटरसाइकल खोजीमा उत्कृष्ट काम गरेकाले उनिहरुलाई सम्मान गरिएको गाउँपालिका अध्यक्ष किरण राईले बताए । शान्ति सुरक्षा कायम गर्दै जनताको जनधनको रक्षा गर्न रातदिन खटने राष्ट्र सेवक प्रहरीको कामको मुल्याङ्कन गर्न सके थप काम गर्न हौसला मिल्ने अध्यक्ष राईको भनाई छ ।
अध्यक्ष राईका अनुसार यस अघि भोजपुरबाट हराएका मोटरसाइकल खोजीमा प्रहरी निरीक्षक अधिकारीको कमाण्डमा खटिएको प्रहरीले मोटरसाईकल सहित चोरीमा संलग्नहरुलाई पक्राउ गरेको थियो । अधिकारी नेतत्वमा खटिएको प्रहरीले जिल्लाको बिभिन्न ठाउबाट हराएका ४ ओटा मोटरसाइकल सहित चोरीमा संलग्न सखुवासभाका ७ जनाको गिरोहलाई नियन्त्रणमा लिएको हो ।
हराएका मोटरसाइकल प्रहरीको सकृयतामा फेला परे पछि स्थानीयले प्रहरीको कामलाई प्रशंसा गरेका छन् । चोरी भएका मोटरसाइकल सम्वन्धित मोटरसाईकलका धनीलाई जिम्मा लगाइ सकिएको जिल्ला प्रहरी कार्यालय भोजपुुरले जनाएको छ ।
