बेलबारी । डा. नरेन्द्र चापागार्इं स्मृति साहित्य पुरस्कार २०७८ बाट कवि तथा समालोचक डा. विप्लव ढकाल र डा. नरेन्द्र चापागाई स्मृति युवा प्रतिभा पुरस्कार २०७८ बाट कवि रेखा सुवेदी पुरस्कृत भएका छन् ।
शनिबार बेलबारीस्थित नगरपालिकाको सभाहलमा आयोजित पुरस्कार समर्पण तथा कवि गोष्ठी कार्यक्रमको बीचमा उक्त पुरस्कार वितरण भएको हो ।
कवि तथा समालोचक डा.विप्लव ढकाल नगद २१ हजार र कवि रेखा सुवेदीले नगद ११ हजार १ सय ११ सहित सम्मानित भएका हुन् । प्रा.डा. टङ्कप्रसाद न्यौपाने, प्रा.डा. बद्रीविशाल पोखरेल, प्राज्ञ दधिराज सुवेदी, प्राज्ञ विवश पोखरेललगायत साहित्यकारहरूको सहभागिता रहेको थियो ।
बेलबारी नगरपालिकाका मेयर दिलप्रसाद राई उक्त पुरस्कारका संरक्षक सरला चापागाईंलगायतले संयुक्तरूपमा पुरस्कार वितरण गरेका थिए । डा. नरेन्द्र चापागाईं स्मृति प्रतिष्ठान विराटनगरको आयोजनामा उक्त कार्यक्रम भएको हो । निर्जन बन्दरगाह, कालो मध्यान्तर, प्रोफेसर शर्माको डायरी र च्याउको जङ्गल डा. विप्लव ढकालका बहुचर्चित कविता सङ्ग्रह मानिन्छन् ।
