विजयपुर । सिटी सफारीको ब्याट्री चोरीमा संलग्न ३ जना पक्राउ परेका छन् ।
शुक्रबार विराटनगर–६ बाट सफारीको ब्याट्री चोरी गरी लैजाने क्रममा उनीहरू पक्राउ परेका हुन् । पक्राउ पर्नेहरूमा विराटनगर–८ का २२ वर्षीय मोहम्मद जुमन, विराटनगर–११ का ३४ वर्षीय मोहम्मद अन्सारुल र विराटनगर–१२ का २२ वर्षीय पवन रविदास रहेको जिल्ला प्रहरी कार्यालय मोरङका प्रमुख एसपी शान्तिराज कोइरालाले जानकारी दिए ।
उनीहरूलाई विराटनगर–६ स्थित रामपुर चौकमा सिटी सफारीको ५ थान ब्याट्री चोरी गरी लैजाने क्रममा को.२ ह ३६१० नम्बरको अटो टेम्पोसहित पक्राउ गरेको हो । उनीहरूलाई वडा प्रहरी कार्यालय (क) विराटनगरबाट खटिएको प्रहरी टोलीले पक्राउ गरेको थियो ।
एसपी कोइरालाका अनुसार अनुसन्धानका क्रममा वि.न. १ ह ००९३ नम्बर र को. १ ह ७८१८ नम्बरको दुई वटा सिटी सफारीसमेत चोरेको खुलेको बताए । उनले चोरी गरेको सफारीको ब्याट्री झिकेर बिक्री गर्ने र सफारी बेवारिस छोडिदिने गरेको उनले बताए । उनका अनुसार ब्याट्री आठ–दश हजारमा बिक्री गर्ने गर्दथे । उनीहरूमाथि थप अनुसन्धान भइरहेको उनले बताए ।
