धरान । आफ्नै आमाको हत्या आरोपमा छोरा पक्राउ परेका छन् ।
मोरङ उर्लाबारी नगरपालिका–४ आइतबारेका ३५ वर्षीय गङ्गाप्रसाद भण्डारीलाई पक्राउ गरिएको हो । उनले आइतबार ७० वर्षीया आमा चन्द्रमायाको घरायसी विवाद हुँदा दाउराको चिर्पटले टाउकोमा प्रहार गरी हत्या गरेको अभियोगमा पक्राउ गरिएको इलाका प्रहरी कार्यालय उर्लाबारीले जनाएको छ । आमाको हत्या आरोपमा पक्राउ परेका गङ्गाप्रसादलाई कर्तव्य ज्यान मुद्दामा म्याद थप गरी अनुसन्धान अगाडि बढाइएको छ ।
घटना भएको जानकारी पाएलगत्तै इलाका प्रहरी कार्यालय उर्लाबारीको टोलीले गङ्गाप्रसादलाई नियन्त्रणमा लिएको हो । नियन्त्रणमा लिएपश्चात् जिल्ला अदालत मोरङबाट ५ दिनको म्याद थप गरी अनुसन्धान अगाडि बढाइएको जिल्ला प्रहरी कार्यालय मोरङका प्रवक्ता एवम् डिएसपी दीपक श्रेष्ठले जानकारी दिए ।
