धरान। धरान सहरको ‘कभर भर्सन’ लाई शिव लामिछाने ‘शिवाज’ ले आफ्नो स्वरमा रकेर्ड गरेका छन् ।
हालै ज्ञान सुब्बाको स्वरमा ‘धरान सहर’ गीतको भिडियो सार्वजनिक भएको थियो । उक्त गीतलाई शिवाजले आफ्नो स्वरमा कभर भिडियो तयार गरेका हुन् । उनले भने, ‘आफ्नो ठाउँको बारेमा गीत सुनेपछि आफूलाई एकपल्ट गाउने रहर जागेर आयो ।’ उनका अनुसार गायक सुब्बाको अनुमति लिएर कभर भर्सन तयार गरिएको हो । शिवाजले भिडियोसमेत निर्माण गरेका छन् ।
उनले गीत मन परेकाले कभर भर्सन बनाएको बताए । गायक सुब्बाले भने, ‘शिव एकदमै प्रतिभाशाली छन्, उनको कभर भर्सन मेरोभन्दा पनि राम्रो भएको पाएँ ।’ उनले गीत मन पराएर गीत गाइदिएकोमा गायक शिवाजलाई धन्यवाद दिए । सुब्बाको स्वरमा रहेको गीतमा जीवन भट्टराईको सङ्गीत र हर्क चुम्मेको शब्द रहेको छ ।
