धरान । वरिष्ठ गायक दीप श्रेष्ठको ७१ औं जन्मदिन धरानमा विभिन्न कार्यक्रम सहित मनाइएको छ ।
बुधबार विहान धरान सरोकार समाज काठमाडौं, सिल्भर इन्टरटेन्मेन्ट प्रालि र ग्रीन तारा ग्रुप अफ कम्पनीको टोलि धरान–१३ स्थित दीपकै वासस्थानमा पुगी केक काटेर जन्मदिनको शुभकामना व्यक्त ग¥यो । समाजका अध्यक्ष प्रभु श्रेष्ठ, महासचिव सरु जोशी, ग्रीन तारा ग्रुप अफ कम्पनीका प्रबन्ध निर्देशक सम्राट श्रेष्ठ, सिल्भर इन्टरटेन्मेन्टका प्रबन्ध निर्देशक सौरभ श्रेष्ठ, युवा नेता दीपक बनेपाली लगायतले वरिष्ठ गायक श्रेष्ठलाई खादा ओढाएर जन्मदिनको शुभकामना व्यक्त गरे ।
बुधबारै सुनसरी जिल्ला बक्सिङ संघले पनि विशेष कार्यक्रमको आयोजना गरेर वरिष्ठ गायक दीपको जन्मदिन मनाएको छ । धरान रंगशाला स्थित संघको कार्यालयमा राष्ट्रिय खेलकुद परिषद्का पूर्व सदस्य तथा धरान सरोकार समाज काठमाडौंका अध्यक्ष प्रभु श्रेष्ठको प्रमुख आतिथ्य र वरिष्ठ बक्सिङ प्रशिक्षक अनुप लामाको विशेष आतिथ्यमा आयोजीत कार्यक्रममा वरिष्ठ गायक दीपलाई खादाले सम्मान गरिनुका साथै बक्सिङ संघको मानार्थ सदस्यता पनि प्रदान गरिएको छ ।
