धरान । लामो समयदेखि धरानको सांगीतिक क्षेत्रमा चिनिएका गायक ज्ञान सुब्बाको नयाँ गीत ‘ओ व्यस्त जीवन’को भिडियो सार्वजनिक भएको छ ।
रबिन बान्तवा खावोहाङ राईको शब्द÷संगीत रहेको यो गीत कर्मथलोका रुपमा हङकङमा बसोबास गर्ने गायक ज्ञान सुब्बा र गीतकार तथा संगीतकार रबिन बान्तवा खावोहाङ राईको आफ्नै ब्यस्त जीवनका भोगाईहरु बारे केन्द्रीत छ ।
सोनाम पाख्रिनको निर्देशन रहेको भिडियोमा नायिका छुल्ठिम गुरुङ्ग , बालकलाकार सरगम राई र निर्देशक पाख्रिन स्वयंको अभिनय छ । भावना रेकर्डिङ्ग स्टुडियो धरानमा रेकर्ड गरिएको तथा गोपाल रसाइलीको संगीत संयोजन र मिन बिस्टको मिक्सिङ्ग रहेको भिडियोमा बुद्ध थापाको छायांकन, सुशील न्यौपानेको सम्पादन रहेको छ ।
आधुनिक गीतहरु गाउन मन पराउने गायक ज्ञान सुब्बा बिगत ५ बर्ष देखि लगातार आफ्ना गीतहरु नेपाली सांगीतिक आकाशमा निरन्तर पस्किरहेका छन् । अढाई दशक अघिदेखि नै धरानको सांगीतिक माहोलमा भिजेका सुब्बाले त्यो समयमा पनि एउटा एल्बम बजारमा ल्याएका थिए । उनको ‘तिम्रो प्रतिक्षा’ एल्बमको गीत ‘हिउँदको घाम जस्तै’ स्रोताले मन पराएका थिए । यहि गीतको भिडियोबाट पल शाह र अलिशा राईको जोडी पनि स्टारका रुपमा उदाएका थिए ।
