नायिका मिरुना मगरले अभिनय गरेका फिल्म व्यावसायिकरूपमा सफल छैनन् । तर उनले लगातार फिल्म पाएकी छन् ।
हालै रिलिज भएको फिल्म ‘चच हुई’ बाट उनलाई धेरै आशा थियो । तर, यो फिल्म पनि फ्लप हुनबाट बचेन । ‘चच हुई’ भन्दा अघि मिरुनाले अभिनय गरेको फिल्म ‘साइनो’ प्रदर्शन भएको थियो । यो फिल्म त झन् चर्चा पनि नपाई हलबाट उत्रियो । फिल्मको स्किृप्ट भुवन चन्दले १ वर्ष लगाएर खोजेकी थिइन् । फिल्मबाट टिमलाई धेरै आशा थियो ।
‘यो फिल्म किन चलेन भन्ने मैले बुझ्नै सकिनँ, हेरेका दर्शकले त फिल्म राम्रो छ भन्नुभयो तर दर्शकले फिल्म नै हेर्नुभएन’ मिरुनाले भनिन्, ‘मैले फिगर आउट गर्नै सकिनँ ।’
उनले ‘साइनो’ बाट राम्रो प्रतिक्रिया पाएको पनि बताइन् । तर यो फिल्म दर्शकको ठूलो समूहमाझ पुग्न सकेन । मिरुनाले अहिलेसम्म आफूलाई कुनै फिल्मले पनि घाटामा नपारेको बताइन् । डेब्यु फिल्म ‘लालपुर्जा’ नै व्यावसायिक हिसाबले असफल भए पनि मिरुनाको भने त्यतिबेलादेखि नै चर्चा हुने गरेको छ ।
मिरुना सामाजिक कार्यमा पनि सक्रिय छिन् । समाजशास्त्रकी विद्यार्थी मिरुनाले सामाजिक कार्य गर्नमा रुचि भएको बताइन् ।
