यमन आक्रमणमा ४० बालबालिकासहित ५१ काे मृत्यु

मृतकमध्ये ४० जना बालबालिका रहेका अन्तर्राष्ट्रिय रेडक्रस समितिले मङ्गलबार जनाएको छ । उक्त हवाई आक्रमणमा ७९ जना घाइते भएका थिए । यमनमा हुथी विद्रोहीविरुद्ध साउदी अरब नेतृत्वको गठबन्धनले यहाँको सरकारलाई सघाउँदै आएको छ ।

अमेरिका तथा केही पश्चिमा देशहरूका सरकारले पनि हुथी समूहविरुद्धको कारबाहीमा हतियार तथा युद्धक विमानसहयोग दिई यमनी राष्ट्रपति अवेद्रब्वो मन्सुर हाडीको सरकारलाई सघाउँदै आएका छन् ।

यमनमा पटकपटकका आक्रमणमा निर्दोष नागरिक तथा बालबालिकाको मृत्यु भएपछि अमेरिका तथा यूरोपका कतिपय मुलुकले गठबन्धनलाई सम्वेदनशील भएर हुथी विद्रोही विरुद्धको कारबाहीमा अघि बढ्नुपर्ने धारणा राखेका छन् ।

संयुक्त राष्ट्रसङघले बालबालिकामाथि लक्षित गरी भएको आक्रमणको आलोचना गरेको छ भने साउदी नेतृत्वको गठबन्धनले घटनाबारे छानविन गर्ने जनाएको छ ।

घटनापछि यमनमा अमेरिका र साउदी अरबको विरोध गर्दै हजारौँको सङ्ख्यामा प्रदर्शनहरू भएका बताइएको छ । यमनमा हुथी विद्रोहीले यमनी सरकार विरुद्धको आन्दोलनलाई राजधानी सानातर्फ लक्षित गरेपछि साउदी गठबन्धनले सन् २०१५ मा हस्तक्षेप गरेको थियो । द्वन्द्वमा परी १० हजारभन्दा बढी यमनी नागरिकको मृत्यु भएको राष्ट्रसङ्को तथ्याङ्क छ ।